Приведен Словенец кој седум пати се вакцинирал против ковид во име на други луѓе
Словенец е приведен откако во изминатите два месеци седум пати се вакцинирал против ковид-19, а покрај него, кривично ќе одговараат уште четворица други, на чие име се тој се вакцинирал за да можат тие да добијат ковид сертификати.
Овие луѓе се обвинети за манипулација при вакцинацијата, зашто намерно ги довеле во заблуда здравствените власти за да им издадат ковид-потврди. Тие може да добијат до три години затвор, пишуваат словенечките медиуми.
Според полицијата, четворицата мажи кои не сакале да се вакцинираат, за пари ангажирале лица со социјални потреби, кое во различни центри за вакцинација, се вакцинирале користејќи ја нивната здравствена легитимација. Човекот бил уапсен при осмиот обид за вакцинација и сега се наоѓа во притвор.
„Лицето за тие вакцинирања од другите четворица осомничени, кои ги искористиле неговите потреби и околности во кои живее, добило ниска парична награда, а тие го навеле на кривично дело, не водејќи сметка за неговото здравје“, стои во соопштението на словенечката полиција.
Првите случаи на слично фалсификување на ковид статусот во Словенија се забележани во септември, кога во Љубљана беа пријавени неколку случаи дека оние на кои им треба потврда за КОВИД, а не сакаат да се вакцинираат, ангажирале други и им платиле. Вообичаено, тоа го преземале луѓе од маргините, бездомници или зависници, а за една добиена доза добивале околу 150 евра.