Приватна истражителка од Австралија, која со години открива случаи на неверство, тврди дека постои една необична навика што често ја имаат мажите кои ги изневеруваат своите партнерки – опсесивно чистење на автомобилот, пишува „Ледбајбл“.

Кеси Крофтс, која ја води платформата „Венус инвестигејшнс“, специјализирана за проверки на партнери и откривање неверства, вели дека низ годините забележала повторлив модел кај многу мажи што започнуваат афера.

„Јас сум приватен истражител и сум открила стотици неверства. Постои еден навистина чуден знак што постојано се повторува кај мажите кои изневеруваат“, рекла таа.

Според неа, не станува збор за класични знаци како доцнење од работа или постојано користење телефон, туку за нешто многу посуптилно – автомобилот одеднаш станува беспрекорно чист.

„Мажите почнуваат редовно да го перат автомобилот, да го носат на детално чистење и да внимаваат сè да биде совршено средено, иако претходно тоа воопшто не им било важно“, објаснила Крофтс.

Таа додава дека на почетокот на нова врска или афера луѓето често вложуваат повеќе труд не само во својот изглед, туку и во впечатокот што го оставаат преку работите што ги поседуваат.

„Има нешто во новата афера што ги тера мажите да сакаат совршено чист автомобил“, вели таа.

Нејзиното видео предизвикало бројни реакции на социјалните мрежи, а многумина споделиле сопствени искуства.

„Мојот поранешен партнер постојано проверуваше дали сум ги земала сите мои работи од автомобилот – очила, шише вода, капа… Сега ми е јасно зошто“, напишала една жена.

Друга открила дека во автомобилот на поранешниот сопруг пронашла маскара од друга жена.

„Тој секогаш го чистеше автомобилот за да не остане ништо сомнително“, напишала таа.

Некои корисници додале дека покрај чист автомобил, чести „аларми“ се и нов парфем, нова фризура или ненадејна опседнатост со изгледот.

Според анкета на „ЈуГов“, секој петти возрасен човек во Велика Британија признал дека барем еднаш го изневерил партнерот.

Истражувањето покажало и дека мажите почесто започнуваат афери со колешки од работа, додека жените најчесто влегуваат во врски со луѓе од блискиот круг пријатели.

Дополнително, мажите почесто повторуваат неверство – 49 проценти од мажите што изневериле признале дека тоа го направиле повеќе од еднаш, во споредба со 41 процент од жените.

@venusinvestigations When people cheat, it’s not always just their own appearance that starts improving 🤔 #privateinvestigator #cheating #dating ♬ original sound – Venus Investigations