Групата, сочинета од обвинетите за незаконското масовно прислушување, била именувана „Важна“, тврди обвинителот Трајче Пеливанов во завршните зборови за предметот „Таргет-Тврдина“. Тој вели дека обвинителството има доволно докази за делото и потсети на дел од сведочењата во досегашниот процес на судење.

Ристоска: За жал ова не е ниту филм, ниту крими роман

– Јасно произлегува дека биле маркирани телефони за прислушување и тоа без судска наредба, туку по директна насока од обвинетиот Горан Грујовски, истакна Пеливанов.

Обвинителот додаде дека системот за прислушување бил инсталиран и надвор од Управата за безбедноист и контраразузнавање (УБК), односно во Бирото за јавна безбедност (БЈБ), но и надвор од кругот на Минисѕтерството за внатрешни работи (МВР).

– По налог на Горан Грујовски, сведокот Ѕвонко Костовски ја монтирал опремата во простории во близина на средното училиште „Илија Николовски-Луј“, односно кај Македонската опера и балет. Потоа и во поранешните простории на Агенцијата за иселеништво и му биле дадени конкретни насоки какви кабли и компјутери да постави, со што таму биле достапни сите мрежи што ги имало и во УБК, рече Пеливанов, дополнувајќи дека, од друга страна, во истата мрежа биле поставени и компјутери кои се наоѓале во Аероклубот, спроти средното училиште ‘Јосип Броз Тито’, но и во т.н. зграда „Парламентарка“, во близина на Железничката станица.

Според обвинителството, и од овие локации можело да се прислушува и транскрибира, но оние што тоа го вршеле, наместо да транскрибираат во постоечкиот систем, тоа го правеле во програмата „Ворд“, а таргет биле политичари и новинари.

Пеливанов нагласи дека на овие лица, вработени во службите на позиција „репродуцери“, ова делување не им било дел од редовните работни задачи.