Пресврт во Италија, Несторовски и Трајковски остануваат во Серија Б
Илија Несторовски и Александар Трајковски доколку останат во Палермо и наредната година, повторно ќе настапуваат во Серија Б. Италијанската фудбалска федерација пред две недели, административно го прати Палермо во понизок ранг поради финансиски малверзации на поранешниот претседател, Маурицио Зампарини.
Но, денеска италијанскиот Федерален суд ја усвои жалбата на Палермо, ја преиначи првобитната одлука и го остави тимот на македонските репрезентативци во втората по квалитет лига во Италија.
Наместо преселба во понизок ранг, на Палермо му се одземени 20 бодови, со кои останува во Серија Б (од 63 падна на 43) бидејќи има пет бодови повеќе од екипите кои ќе играат бараж за опстанок. Палермо исто така е казнет и со 500.000 евра.
Палермо од страна на Италијанската фудбалска федерација беше исфрлен од Серија Б, откако се потврди дека поранешниот сопственик Маурицио Зампарини, переше пари преку клубот така што го продаде на компанија која тој ја основа за одредена сума, а потоа за минимална сума си го откупи назад клубот.