Преспанското Езеро се буди – водостојот порасна за 48 сантиметри за два месеца
Обилните дождови во ноември и јануари предизвикаа поплави во преспанските села, но истовремено го подигнаа нивото на езерото за речиси половина метар, разбудувајќи надеж дека долгогодишниот пад конечно е запрен.
За два месеца нивото на Преспанското Езеро нарасна за 48 сантиметри, според податоците од дневните извештаи на Управата за хидрометеоролошки работи (УХМР), пренесе порталот СДК.
Препорачано
-
1
-
2
-
3
Обилните врнежи од дожд кои паднаа во изминатите два месеца, околу 21 ноември минатата година (2025) и на 7 јануари годинава (2026), поплавија куќи, магацини, дворови и овоштарници, но донесоа и надеж за Преспанското Езеро.
Според податоците објавени од УХМР, водостојот на Езерото измерен кај мерната станица во Наколец на 8 јануари 2026 година изнесуваше 841,36 метри надморска височина (мнв). Доколку тоа се спореди со водостојот од 7 ноември 2025 година, односно периодот пред дождовите кога нивото беше 840,88 мнв, пресметките покажуваат дека водостојот е пораснат за 48 сантиметри.
Нивото од 7 ноември до 2 декември лани се зголеми за 27 сантиметри, кога водостојот достигна 841,15 мнв, а оттогаш до сега за дополнителни 21 сантиметар.
