Прекрасна вест: Барди е негативен на коронавирус, ќе настапи против Австрија на ЕП
Одличната атмосфера во македонската фудбалска репрезентација по убедливиот триумф на Казахстан, денеска е дополнително крената на повисоко ниво бидејќи последниот тест на коронавирус на Енис Барди е негативен.
Ова значи дека еден од најстандардните играчи во репрезентацијата од денеска ќе може да им се приклучи на соиграчите на завршните подготовки пред настапот на Европското првенство, а исто така и селекторот Игор Ангеловски ќе може да смета на Барди за првиот натпревар на ЕП кој неговите избраници ќе го играат на 13 јуни против Австрија.
Барди по пристигнувањето во Македонија, имаше позитивен тест на коронавирус иако немаше никакви симптоми поради што беше ставен во карантин во хотелот „Хилтон“. Дополнителна доза на неизвесност внесе и вториот тест кој беше направен пред три дена и исто така беше позитивен иако македонскиот репрезентативец немаше никакви симптоми и веќе тренираше одвоено од останатите репрезентативци. Исто така, Барди го пропушти и двата контролни натпревари на репрезентацијата, првиот со Словенија (1:1) и вчерашниот со Казахстан (4:0).
Но, денеска Барди има негативен тест и заедно со останатите репрезентативци ќе ги одработи последните три дена од подготовките во Скопје по што репрезентацијата на 8 јуни патува за Букурешт каде ќе ги одигра натпреватите од првите две кола на ЕП, на 13 јуни против Австрија и на 17 јуни против Украина.