Светската премиера на новиот македонски игран филм „Преекспонирано“ на режисерката Елеонора Венинова ќе се одржи на Меѓународниот филмски фестивал во Каиро.

Првиот долгометражен филм „Преекспонирано“ на режисерката Елеонора Венинова премиерно ќе биде прикажан во официјалната конкуренција на филмски фестивал од А-категорија. Станува збор за 44. Меѓународен филмски фестивал во Каиро, кој ќе се одржи од 13 до 22 ноември.

– Филмот „Преекспонирано“ е проект на кој работам десет години, од тогаш датира првата верзија на сценариото, кое е поддржано од Агенцијата за филм на Северна Македонија, и по неколку измени дојдовме до оваа конечна верзија на сценариото која ја снимивме. Бевме први што снимаа во време на пандемијата, во услови на карантин, но задоволни сме и со нетрпение очекувам филмот да ѝ го претставиме на публиката – рече режисерката Елеонора Венинова на прес-конференција што се одржа во Кинотеката.

Венинова потенцираше дека станува збор за драма, делумно инспирирана од вистински настани. Приказната, како и другите нејзини филмови, има личен момент и говори за брачна двојка што престојува во викенд куќа во Охрид, а нивниот мир и брачна идила е нарушена од тинејџерка, која е ќерка на нивни блиски пријатели. Тие двајца ќе се доведат во ситуација да го преиспитаат својот брачен живот.

Главните улоги ги толкуваат Камка Тоциновски, Благој Веселинов и Сара Климоска. Кинематографер е Лев Предан Коварски, музиката е на Линдзи Рајт, сценографијата на Срѓан Митровиќ, костимите ги дизајнираше Жаклина Крстевска, а сценариото е на Елеонора Венинова. Монтажата на филмот е на Гоце Кралевски, монтажер за звукот е Дарко Спасовски. Македонски продуцент е Гоце Кралевски („ДНФ Филмс“), а копродуцент е Мирјана Томиќ („Лилит“ – Србија).

За актерката Сара Климоска ова е прва соработка со режисерката Венинова, додека за актерот Благој Веселинов особен впечаток оставила работата во време на пандемијата и смета дека филмот има нешто поразлично што досега не го видел во друг македонски филм, односно има внатрешна емотивна борба со која се соочуваат актерите.

– Овој филм ми е многу драг, бидејќи дотогаш никој не снимаше, беше пандемија и сите се прашувавме што ќе се случува понатаму, како ќе работиме. Елеонора и Крале ги зедоа работите во свои раце и среќен сум што успеав да го одвојам Благој Веселинов од ликот којшто го играм во филмот. Тоа за мене е голема среќа, а понатаму публиката ќе го каже своето мислење – рече Веселинов.

Филмот е снимен со поддршка од Агенцијата за филм, од „Еуримаж“ и Српскиот филмски центар. Продуцентот Гоце Кралевски информираше дека покрај светската премиера, очекуваат набргу и европска премиера, исто така на голем меѓународен фестивал од А-категорија, а на пролет филмот ќе може да го погледне и македонската публика.

(Текстот е објавен во „Културен печат“ број 151, во печатеното издание на весникот „Слободен печат“ на 22-24 октомври 2022)