Пратеникот на ЗНАМ, Миле Цеков, го напушти парламeнтарното мнозинство и во иднина ќе делува како независен пратеник. Тој во изјава за телевизијата „24“ вели дека во политиката влегол за да ја смени политиката, а не себеси, и дека е незадоволен од многу работи.

– По две години како дел од власта, сакам јасно да соопштам дека од овој момент ќе делувам како независен пратеник кој не е дел од власта. Станав пратеник пред две години за да се обидам да ги променам работите, да побарам одговорност за криминалот и корупцијата, да се борам за промена на системот, но и да покажам дека има место во политиката за чесни и работливи луѓе. Но, за жал, промените не се случуваат – вели Цеков за ТВ „24“ и додава дека е отворен за соработка со сите кои ги делат неговите вредности.

Во однос на уставните измени тој останува на ставот дека нема ништо против да се внесат Бугарите во Уставот и дециден е дека поддржува влез во ЕУ, но само со заштитен национален идентите.

– Мојот став е непроменет конзистентен и принципиелен, а тоа дека како демократ кој ги почитува човековите и малцинските права, апсолутно не сум против да бидат внесени Бугарите, Хрватите, Црногорците во нашиот Устав, но со заштитетни национални и идентитетски интереси. Повторувам со јасни заштитетни национални и идентитетски прашања. Исто така како демократ сакам мојата држава Македонија да влезе како полноправна членка во Европската Унија со јасен и чист македонски јазик култура и идентитет. Всушност тие теми не се за преговарање, тие се темелот на нашето постоење – изјави неодамна Цеков во интервју за „Локално“.

Цеков подолго време не се согласуваше со раководството на ЗНАМ и за повеќе законски решенија во Собранието гласаше спротивно од ставот на владејачкото мнозинство.

Максим Димитриевски за ставовите на пратеникот Миле Цеков: Дебати може да има, сè додека не се злоупотреби довербата на граѓаните

Пратеничката група на ЗНАМ по напуштањето на Цеков, ќе брои пет пратеници.