Џими Кимел ќе се врати на сцената по четврти пат како водител на престижното доделување на Оскарите, кое ќе се одржи според планираниот датум на 10 март 2024 година.

Познатиот водител и комичар ќе биде домаќин на 96. доделување на Оскарите, а неговата сопруга Моли МекНирни ќе биде извршен продуцент на телевизиската емисија.

„Отсекогаш сонував да бидам домаќин на Оскарите точно четири пати“, се пошегува Кимел.

Инаку, Кимел беше домаќин на доделувањето на наградите во 2017, 2018 и 2023 година.

„Џими се етаблира како еден од најголемите водители на Оскар на сите времиња благодарение на неговиот совршен спој на добрина и хумор“, изјавија извршните продуценти Раџ Капур и Кети Мулан.

Оскарите веќе неколку години немаат добра публика, а еден од начините да се врати преносот на церемонијата во златното доба кога го гледаа 50 милиони гледачи е доколку се избере познато лице како што е Кимел.

Овојпат доделувањето на оваа престижна филмска награда ќе се одржи во време кога Холивуд закрепнува по шестмесечната парализа поради штрајкот на сценаристите и актерите.

Штрајкот, каков што не е забележан од 1960-тите, поттикна големи тензии меѓу филмските студија и работниците во индустријата загрижена од стримингот и вештачката интелигенција.