Над половина од странските инвеститори во држава се изјасниле дека планираат повторни вложувања во македонската економија, информираше претседателот на Советот на странски инвеститори во земјава, Виктор Мизо. Странските инвеститори имаа состанок со премиерот Христијан Мицкоски во Стопанската комора.

-Педесет и пет проценти од компаниите дадода афирмативна одлука за реинвестирање во државата што е зголемување за 13 процентни поени од анкетата во 2024 година. Разговаравме и за останатите отворени прашања како дополнителното намалување за 50 отсто на царинските стапки што ќе се направи од 1 јули годинава, а тоа значи дека ќе имаме целосна хармонизација и поголема конкурентност на нашето производство тука и на исто ниво со конкурентноста во земјите на ЕУ. Во однос на минималната плата, ние го поздравуваме она што значи останување на заложбите врз основа на законски дефинираните регулативи и да се земе предвид и продуктивноста, а не да биде ад-хок зголемување само заради потребите кои не соодветствуваат на конкурентноста на државата – рече Мизо по средбата.

Премиерот Мицкоски рече дека имале успешна дебата и дека Владата ќе ги анализира критиките и аргументите изнесени на средбата.