Судот за спортска арбитража (ЦАС) во Лозана ја отфрли жалбата на поранешниот претседател на Фудбалската федерација на Авганистан на доживотната суспензија што ја доби поради сексуална злоупотреба на фудбалерки, односно репрезентативки.

ЦАС ја потврди суспензијата и изјави дека Керамудин Карим извршил „ужасни дела“ над фудбалерките кои го обвинија за пет години сексуална злоупотреба од 2013 година.

Преземени се посебни безбедносни мерки за заштита на фудбалерките за време на сведочењето.

– Фудбалерките сведочеа од безбедно место, преку телефон, користејќи програми за препознавање на глас за да се заштити нивниот идентитет – пишува во соопштението.

Покрај жалбата на суспензијата која ја одреди Меѓународната фудбалска федерација (ФИФА), беше одбиена и жалбата на паричната казна од еден милион швајцарски франци. Тоа е максималната казна што може да ја одреди ФИФА.

– Керамудин Карим ги прекрши основните човекови права и нанесе штета на психичкото и физичкото достоинство и интегритет на младите фудбалерки. Со неговите ужасни дела, тој не само што ги уништи нивните кариери, туку и сериозно ги оштети нивните животи – се вели во соопштението на судот.

ФИФА го суспендираше Карим за време на Светското првенство во Франција во јуни 2019 година, откако беше покрената истрага заснована врз наводите од женските национални репрезентативни селекции на Авганистан.