Сеизмолошката опсерваторија при Природно-математичкиот факултет во Скопје соопшти дека земјотресот кој вечерва ја погоди Македонија имал јачина од 4,6 степени според Рихтеровата скала, а дека епицентарот, наспроти првичните информации, бил на косовска територија, во близина на границата со Македонија.

„Телеметриската сеизмолошка мрежа на Република Северна Македонија одржувана од Сеизмолошката опсерваторија при Природно-математичкиот факултет во Скопје, вечерва во 22 часот и 5 минути регистрира земјотрес чиј епицентар потекнува од територијата на Р. Косово, на околу 45 км северозападно од Скопје, со Рихтерова локална магнитуда, ML4.6“, велат од Опсерваторијата.

„Според досегашните податоци со кои располагаме, земјотресот е почувствуван во Тетово, Гостивар и околината со интензитет од V степени според Европската макросеизмичка скала, во Скопје и околината со интензитет од IV-V степени, во останатите делови од Републиката со интензитет од III-IV степени според Европската макросеизмичка скала“, пишува во соопштението.

Според податоците достапни на интернет и според сведоштвата на граѓани на социјалните мрежи, земјотресот бил почувствуван во делови од сите соседни држави, во кои тој е забележан и на официјалните сеизмолошки мерни инструменти.

Силен земјотрес ја стресе Македонија, се почувствувал насекаде