По невремето во Тетовскиот регион, покрај голем број штети пријавено е и паѓање на потпорен ѕид врз куќа, поради што како што велат од  Центарот за управување со кризи, на терен се полициски екипи и општински инспекциски служби.

Евидентирани се и повеќе свлечишта – на патот кон Попова Шапка, на околу 150 метри од жичарата, а како што се додава одронот претставува ризик за околните станбени објекти. Големо свлечиште е регистрирано на улица 195, на патниот правец од с. Џепчиште кон с. Џермо. Патот е непрооден за цело маало. Како и свлечиште на улица „Прохор Пчински“. Во село Вејце пријавено е свлечиште над куќа со веќе постоечки оштетувања од земјотресот.

Во Општина Желино, реката Вардар се излеа во село Стримница, при што се поплавени пет куќи. Поради конфигурацијата на теренот, пристапот за интервенција е отежнат. Во Општина Теарце пријавени се поплавени подрумски простории во село Теарце. Известени се надлежните институции. Во Општина Јегуновце поплавен е локалниот пат од село Сиричино кон село Јегуновце. Општината испрати механизација и се очекува нормализирање на сообраќајот.

Најкритично со поплавите е во Форино и во Кичево – Слободен печат

Во Гостивар состојбата се стабилизира по престанокот на врнежите. Реките во селата Лакавица, Беловиште, Мало Турчане и Балиндол се повлечени во своите корита.Во село Форино, по излевањето на реката Вардар, водата е повлечена од улиците. Поплавени се околу 200 куќи. Во тек е испумпување на водата со ангажирање на служби и локално население.