САД прекинуваат традиција стара 165 години, за првпат потписот на актуелен претседател, Доналд Трамп, ќе стои на хартиените банкноти што ги печати Министерството за финансии, а редизајнираните банкноти од 100 долари треба да почнат да излегуваат од јуни годинава, пренесува Би-би-си.

Потписот на Трамп ќе се појави покрај потписот на министерот за финансии Скот Бесент, невиден потег за кој министерството соопшти дека ќе ја одбележи 250-годишнината од Америка.

Ликот на Трамп ќе се појави и на метална монета, откако федерална комисија за уметност овој месец го одобри дизајнот на златна комеморативна монета од 24 карати со неговиот лик, по повод 250-годишнината од независноста на Америка на 4 јули.

„Нема помоќен начин да се признаат историските достигнувања на нашата голема земја и претседателот Доналд Џ. Трамп од банкнотите од американски долари што го носат неговото име“, рече Бесент.

Американските банкноти традиционално носат потписи на службеници за финансии.

Ова е најновиот потег на администрацијата да го поврзе името на Трамп со низа владини програми и јавни згради.

Првите банкноти од 100 долари со потписите на Трамп и Бесент ќе бидат испечатени во јуни, а ќе следат и други.

Банкнотите што моментално се печатат ги носат потписите на поранешната министерка за финансии на претседателот Џо Бајден, Џенет Јелен, и благајничката Лин Малерба.

Од 1861 година е традиција потписот на американскиот благајник да се појавува на банкнотите, традиција која ќе заврши според плановите на администрацијата на Трамп.

Пред 250-годишнината, Бесент рече дека печатењето валута со името на Трамп ќе биде „моќен начин да се признаат историските достигнувања на нашата голема земја“ и претседателот.