Португалија си закажа пресметка со Македонија, Бејл игра фантастично за Велс
Селекцијата на Португалија ќе игра против Македонија во финалето од баражот за пласман на Светското првенство во Катар откако во Порто со 3:1 ја совлада Турција.
Португалците поведоа со голот на Отавио во 15. минута, додека на крајот од првиот дел Диого Жота ја удвои предноста. Турците намалија во 65. минута преку Јилмаз кој подоцна беше трагичар на натпреварот поради промашениот пенал во 83. минута. Казната за промашувањето дојде во судиското продолжение кога Нуњез ги постави конечните 3:1.
Финале во баражот за пласман на СП во Катар ќе игра и селекцијата на Велс која со 2:1 ја совлада Австрија. Човек на одлука беше Герет Бејл кој игра фантастично за својата репрезентација постигнувајќи ги двата гола 25. и 51. минута. Австрија во 65. минута намали на 2:1 по автоголот на Дејвис, но немаше сили за израмнување.
Велс во финалето на баражот ќе игра со подобриот од дуелот меѓу Шкотска и Украина,а овој натпревар е закажан за јуни.