Порази на фудбалските надежи
Младите репрезентации на Македонија до 21 и до 16 години доживеаја порази од Казахстан односно Бугарија.
Репрезентацијата до 21 година со пораз го започна настапот на „Анталија Куп“, избраниците на селекторот Благоја Милевски се поразени од Казахстан со 1:2.
Првото полувреме заврши без голови, а во вториот дел Казахстан поведе со 2:0 по што во 80. минута Берат Калкан успеа да го ублажи поразот на Македонија.
Следниот натпревар на „Анталија Куп“, Македонија ќе го има на 27. март кога ќе игра против Словачка која денеска со 2:1 славеше над Бугарија.
Пораз доживеа и репрезентацијата до 16 години на развојниот турнир за фудбалери од генерацијата 2005. Нашите надежи одиграа слабо и под очекувањата, и Бугарија сосема заслужено победи со 0:2. Првиот погодок беше дело на Петар Кирев во 27 минута од натпреварот. Конечните 0:2 ги постави Росен Маринов во 80 минута.