Поранешната премиерка на Нов Зеланд Џасинда Ардерн ќе преземе водечка улога во борбата на земјата против онлајн екстремизмот, соопшти денеска новозеландската влада. На почетокот на годината Ардерн ненадејно се повлече од премиерската позиција и му препушти на Крис Хипкинс да го преземе раководството на владата како лидер на Лабуристичката партија.

Таа сега, како специјален пратеник на глобалната иницијатива „Крајстчерч Кол“, основана во 2019 година, ќе се вклучи во неплатена работа во борбата против екстремизмот. Иницијативата обединува над 120 земји, технолошки компании и даватели на интернет услуги и здруженија на граѓанското општество во колективните напори за борба против сите форми на екстремизам.

Во март 2019 година, во напад на две џамии во Крајстчерч, вториот по големина град во Нов Зеланд, загинаа 51 лице, а 40 други беа повредени. Нападот го изврши 28-годишниот Брентон Тарант, а во пресрет на нападот објави манифест на 87 страници полн со антимигрантски и антимуслимански содржини, како и објаснувања зошто го извршил нападот.

Делови од нападот пренесуваше во живо на својата Фејсбук страница. „Повикот од Крајстчерч е приоритет на надворешната политика и Џасинда Ардерн продолжува да работи на елиминирање на насилниот екстремизам на интернет“, рече Хипкинс.

„Терористичката и друга екстремна насилна содржина на интернет е глобален проблем, но за многумина во Нов Зеланд тоа е многу личен“, додаде тој. Ардерн стана најмладата премиерка во светот кога победи на изборите на 37-годишна возраст.