Помалку сол во исхраната на Американците би значел поздрав живот
Американската администрација за храна и лекови соопшти дека ќе работи на намалување на натриумот во преработената и готова храна.
„Целта е да се намали просечниот внес на натриум, од 3.400 милиграми на 3.000 дневно, во наредните две до три години“ – велат од администрацијата.
Американското здружение за заштита на срцето има препорака – не повеќе од 2.300 милиграми дневно, но препорачува идеална граница од 1.500 милиграми во текот на денот, пишуваат од CNN.
Во 2016, агенцијата за храна објави нацрт насока во која се предложуваат овие намалувања, со цел да се намали внесот на натриум на пошироката популација и да се превенира од заболувања.
„Во иднина планираме да објавиме ревидирани цели за постепено намалување на солта во храната, како би помогнале во остварување на целта. Имајќи предвид колку многу се конзумира солта во исхраната, и намалувањето за 1.000 милиграми дневно, може значително да го подобри крвниот притисок и здравјето на срцето“ – велат од Здружението за срце.
Во соопштението се вели дека со оваа постапка ќе се намали ризикот од хипертензија, срцеви заболувања, мозочни и срцеви удари во наредните децении.