Овогодинaшниот Кански филмски фестивал се отвори под невидени безбедносни мерки, со фокус на голема борба против дрогата. Додека најголемите светски ѕвезди, продуценти и режисери се собираат на Француската ривиера, градските власти одлучија да стават крај на сè поотворената консумација на дрога, која со години е дел од најгламурозниот филмски настан.

Градоначалникот Давид Лиснард нареди насочена операција против дилерите на дрога и нивната трговија, со оглед на десетиците забави што се одржуваат секоја вечер во раскошни хотели, луксузни вили и јахти закотвени во заливот, пренесува „Франс24“.

Со повеќе од 200.000 посетители, Кан станува идеално место за дилерите да ги прошират своите мрежи за време на фестивалот.

– Кога доаѓаат 200.000 луѓе, очигледно е дека има трговија со дрога и ние мора да се бориме против неа – рекол Лиснард, додавајќи дека мерките важат за целото население, како и за посетителите на фестивалот.

Посебно внимание се посветува на полициските тимови со кучиња обучени за откривање кокаин и канабис, кои патролираат по познатата променада Кроазет. Полицијата спроведува случајни проверки на јавни места, фокусирајќи се на областите околу луксузни хотели и локации за фестивали.

Иако полицијата нема овластување да врши рации на приватни забави без судска наредба, нивното присуство на улиците е повеќе од видливо. Шефот на градската полиција во Кан, Ив Дарос, објасни: „Законодавството во моментов нè ограничува на јавни површини, но ова е доволно за да постигнеме добри резултати“.

Многу гости на фестивалот признаваат дека атмосферата се променила, но малкумина веруваат дека ова ќе ја спречи потрошувачката на дрога меѓу елитата.

 – Се надевам дека нема да дојдат и да тестираат некого тука – рекол еден ветеран продуцент. Неговиот колега се сомнева дека акцијата ќе ја потисне потрошувачката на кокаин.

„Коктелите и кокаинот се стари речиси колку и самиот фестивал“, додал тој, заклучувајќи: „Луѓето можеби се малку повнимателни, но нема да престанат да се забавуваат“.

Исто така, имаше поплаки дека полицијата не ги таргетира богатите корисници на кокаин, туку наместо тоа се фокусира на локалната младина и малцинските групи. Еден млад човек во близина на железничката станица рече дека бил запрен петпати во еден ден.

Покрај дрогата, полицијата е во состојба на висока готовност и за организирани кражби на луксузни часовници и скап накит. Со пристигнувањето на богати гости од целиот свет, безбедносните сили оваа година се засилени со специјализирани полициски тимови од Неапол и Мадрид.

79-от Кански филмски фестивал беше отворен во вторник и ќе трае до 23 мај, кога ќе биде доделена престижната „Златна палма“. Фестивалот беше одбележан и со доделување на почесна „Златна палма“ на режисерот Питер Џексон. И покрај богатата уметничка програма со поголем фокус на авторското кино, се чини дека главните теми на улиците на Кан се сè уште полициските рации и борбата против дрогата.

ФОТО | Отворен е 79. Кански фестивал — филмски и модни ѕвезди го преплавија црвениот тепих