Несреќата во која загинаа двајца луѓе, а петмина беа повредени вчеравечер кај прилепското село Радобил, на патот Градско-Прилеп, се случила при претекнување, а двете жртви се од селото Дреново и тие биле во едниот од автомобилите, соопшти МВР.

„На 04.11.2025 во 16:40 часот во ОВР Прилеп е пријавено дека на магистралниот пат Градско-Прилеп, кај с.Радобил, прилепско, се случила сообраќајна несреќа помеѓу патничко возило „киа“ со радовишки регистарски ознаки, управувано од О.О.(31) од с.Тополница, радовишко и патничко возило „фолксваген пасат“ со велешки регистарски ознаки, управувано од Ѓ.П.(35) од с.Дреново, кавадаречко. Од здобиените повреди на местото на несреќата починале возачот Ѓ.П. и неговиот сопатник Б.П.(56) од с.Дреново, кавадаречко. Лекар констатирал смрт, а по наредба на јавен обвинител телата на починатите се дадени на обдукција“, пишува во соопштението од МВР.

Сите повредени во несреќата, пак, биле во другиот автомобил, кој го возел жител на Радовишко.

„Во несреќата со тешки телесни повреди се здобил возачот на патничкото возило „киа“ и неговиот сопатник С.О.(24) од с.Тополница, радовишко, како и сопатниците од патничко возило „киа“ Н.П.(28), Т.П.(53) и С.П.(31) сите од с.Дреново, кавадаречко, констатирани во Градска болница Прилеп и Општа болница Кавадарци. Извршен е увид од јавен обвинител и екипа на ОВР Прилеп“, додаваат од полицијата.