Вчера во Штип е уапсен осомничен за серија измами – охриѓанец кој ја користел познатата приказна со лажни сообраќајни несреќи за да земе пари од постари луѓе, соопшти МВР.

38-годишниот охриѓанец ги лажел луѓето по телефон дека нивни блиски се тешко повредени во сообраќајна несреќа или дека тие прегазиле дете и оти итно треба да платат за роднините да не одат во затвор.

Со овие приказни тој успеал во девет наврати да однесе скоро 60.000 евра од жртвите, велат од полиција.

„По извршен службен разговор, П.С. појаснил за начинот, местото и времето на извршување на девет кривични дела, од кои шест во Штип и три во Виница при што пријавителите се оштетени за околу 3.600.000 денари. До ОЈО Штип поднесена е кривична пријава по итна постапка, а по предлог на ОЈО Штип П.С. е спроведен пред Судија на претходна постапка при што му е одредена мерка притвор“, пишува во полициското соопштение.