Почна судењето: На фудбалерот Дани Алвеш му се заканува затворска казна од 12 години
Денеска во Барселона почна судењето на бразилскиот фудбалер Дани Алвеш, обвинет за силување. Алвеш е обвинет за сексуален напад на жена во ноќен клуб во Барселона на 31 декември 2022 година. Тој негира дека сторил какво било кривично дело.
Судењето е закажано да трае до среда. Обвинителите бараат деветгодишна затворска казна за Алвеш доколку биде прогласен за виновен, додека адвокатите на жртвата бараат 12 години зад решетки.
Поранешниот фудбалер на Барселона е во истражен притвор од јануари 2023 година. Неговите барања да биде ослободен со кауција беа одбиени откако судот оцени дека постои опасност од бегство.
Алвеш (40) е еден од најодликуваните играчи во историјата, во кариерата освои 42 титули, од кои три во Лигата на шампиони со Барселона и две во „Копа Америка“ со репрезентацијата на Бразил.
Својот најголем успех го постигна играјќи за Барса, со која освои 23 трофеи од 2008 до 2016 година.