Актерот Флојд Роџер Мајерс помладиот, најпознат по улогата на младиот принц од Бел Ер во легендарната серија „Принцот од Бел Ер“, почина на само 42-годишна возраст.

Тажната вест ја потврди неговата мајка Рене Трајс за американскиот медиум „ТМЗ“, откривајќи ја причината за смртта.

Според неговата мајка, Флојд починал во раните утрински часови во својот дом во државата Мериленд, откако доживеал срцев удар. Трајс додаде дека, за жал, тоа не му бил прв – во последните три години доживеал три срцеви удари. Таа исто така рече дека разговарала со него ноќта пред неговата ненадејна смрт.

Мајерс ја имаше својата прва телевизиска улога во 1992 година во серијата „Принцот од Бел Ер“, каде што го играше младиот Вил Смит. Истата година, се појави во мини-серијата „Џексон: Американски сон“, играјќи ја улогата на Марлон Џексон. Неговата последна позната улога беше во 2000 година во серијата „Млади Американци“, по што се повлече од глумата.

И покрај неговото пензионирање од индустријата, Флојд остана активен во заедницата – тој беше ко-основач на „Фелашип менс груп“ (Fellaship Men’s Group), која, според нејзината официјална веб-страница, „создава безбедни и поддржувачки простори за мажите отворено да зборуваат за емоционалните и менталните предизвици“.

Мајерс редовно објавуваше содржини за работата на групата на својот инстаграм-профил.

Покрај тоа, тој беше сопственик на компанија за чистење системи за вентилација и сушари. Често споделуваше семејни моменти и фотографии со своите четири деца на социјалните мрежи, нагласувајќи колку му значи семејството.

Во 2023 година, тој исто така откри дека бил во кома, откако доживеал сериозни здравствени компликации.

„Само пред една недела бев во кома, борејќи се за мојот живот! Бог прави чуда. Благословен сум и благодарен што сум жив!“ напиша тој во тоа време, заедно со фотографија од неговиот болнички кревет.