По ужасните обвинувања на соработниците, Елен Деџенерис се врати на работа: Знам дека имам привилегирана позиција и моќ
Една од најпопуларните ТВ водителки во светот, Елен Деџенерис која во изминатите неколку месеци беше обвинета за малтретирање и вознемирување на работно место, се врати на малите екрани и ја започна 18-тата сезона на нејзиното „The Ellen DeGeneres show“.
62-годишната Елен објави видео на својот инстаграм-профил, признавајќи дека работи на себе, но и им даде јавно ветување на сите гледачи кои ја следат на малите екрани, дека таа е истата личност што ја гледаат на телевизија.
„Можеби сте имале шанса да слушнете летово, во нашата емисија се појавија наводни обвинувања за токсична работна средина, а потоа започна и истрага. Дознав дека тука се случуваат некои работи што никогаш не смееше да се случат. Јас го сфаќам тоа многу сериозно и сакам да кажам дека жалам за сите луѓе кои беа повредени“, рече Елен.
Додаде и дека е свесна за својата слава, позиција во општеството и моќта, но дека требало да биде повеќе свесна за тоа што се случувало зад очите на сите.
„Знам дека имам привилегирана позиција и моќ, со што ја преземам одговорноста за она што се случува во мојата емисија. Ова е шоуто на Елен Деџенерис, јас сум Елен Деџенерис“, рече водителката и ѕвездата на анимираниот филм „Finding Nemo“.
„Во последните неколку недели многу разговаравме за шоуто, за нашите работни места и што сакаме во иднина. Ги направивме потребните промени и денес започнуваме ново поглавје“, изјави таа.
Исто така ја коментираше и нејзината репутација и реченицата „бидете љубезни едни кон други“ што секогаш им ја кажува на своите гледачи.
Многумина по сѐ што се случи ја нарекоа крајно нељубезна и арогантна личност. Таа во свој стил се пошегува на своја сметка.
„Вистина е дека јас сум личноста што ја гледате на телевизија. Јас сум и многу други работи. Понекогаш се растажувам, се лутам, станувам нетрпелива, но работам на сето тоа. Особено работам на мојата нетрпеливост, а тоа не оди добро, бидејќи не се случува доволно брзо“, се пошегува таа.
Елен вели дека и покрај тоа што е прилично добра актерка, како хомосексуалка во некои филмови одлично успеала да глуми хетеросексуална жена, но дека сè уште не е доволно добра актерка за да успее да измами милиони свои гледачи во последните 17 години.
„Ова сум јас и се обидувам да бидам што е можно подобра личност. Ако сум изневерила некој или сум повредила нечии чувства, навистина ми е жал за тоа. Во вакви случаи, се изневерувам и повредувам самата себе“, признава Елен.
Таа го заврши својот монолог со оптимистички тон, заклучувајќи дека се надева дека нејзиното едночасовно шоу ќе продолжи и понатаму да ги забавува луѓето.
„Се надевам дека сè уште можеме да бидеме место на среќа и радост. Си ветив дека ова ќе биде најдобрата сезона што сме ја имале“, изјави водителката.