Иако звучи како сцена од филм, во реалниот живот постојат ретки случаи кога луѓе биле прогласени за мртви, а потоа неочекувано „се вратиле меѓу живите“. Ваквите ситуации најчесто се резултат на погрешна проценка на виталните знаци или на специфични медицински состојби кои можат да ја имитираат смртта.

Токму таква судбина доживеал Сифо Вилијам Мдлетше, чија свршеница тагувала по него откако двојката доживеала, на прв поглед, фатална сообраќајна несреќа. Несреќата се случила во 1993 година, по што Мдлетше, тогаш во своите дваесетти години и жител на Себокенг, јужно од Јоханесбург во Јужноафриканската Република, бил прогласен за мртов, пренесува „Мирор“.

Неговото тело било пренесено во мртовечница и, според вообичаената процедура, сместено во ладилник. Сепак, два дена подоцна приказната добила морничав пресврт. Вработените во мртовечницата слушнале чудни и вознемирувачки звуци што доаѓале од една од металните фиоки.

Кога ја отвориле фиоката, ги дочекал неверојатен шок – Мдлетше бил жив. Тој дошол при свест, сфатил каде се наоѓа и почнал да вика по помош. Според извештаите, по несреќата постепено се освестувал сè додека не станал доволно прибран за да реагира. Токму неговото викање му го спасило животот, претворајќи ја оваа приказна во една од најневеројатните случаи на погрешно прогласена смрт.