„Пивтијада 2024“ традиционално за Водици во Автокоманда
Во рамките на прославата на големиот христијански празник Богојавление – Водици, в петок, со почеток во 13 часот, на плоштадот во Автокоманда ќе се одржи традиционалната манифестација „Пивтијада 2024“.
Манифестацијата има културен, натпреварувачки и хуманитарен карактер. Во рамки на културниот дел на манифестацијата ќе настапат естрадните уметници Јордан Митев, Бојана Скендеровски, Огнен Здравковски и Даниела Темелковска. Во рамки на натпреварувачкиот карактер на манифестацијата граѓаните ќе имаат можност да се натпреваруваат со најубаво украсена пивтија – вели градоначалникот на општина Гази Баба, Бобан Стефковски
Според Стефковски, комисија од општината ќе изврши избор на три најубаво украсени пивтии кои ќе бидат наградени.
Во хуманитарниот дел од манифестацијата секој граѓанин преку купување на пивтија ќе има можност да донира, по што собраните средства ќе се донираат во хуманитарни цели.