Иако зимата календарски сè уште не пристигнала, деновите се исклучително студени – а тоа го чувствуваат и нашите домашни миленици, и покрај тоа што се покриени со крзно. Некои кучиња имаат две нивоа крзно, кои одлично ги штитат од студ, но кај други крзното е тенко, па лесно може да дојде до настинки на ниски температури, пишува „Љубимци“.

Постојат неколку раси што се познати по својата чувствителност на студ. Кај следниве пет раси е добро познато дека не ја сакаат зимата и им е неопходна дополнителна грижа во студените месеци.

Хрт

Хртовите се витки, со минимално количество телесни масти и тенко крзно – комбинација која во зима не им помага. Поради тоа, овие елегантни кучиња се многу чувствителни на студ.

Басенџи

Басенџи, познат и како „африканското куче што не лае“, е мал, грациозен ловец со кратко, сјајно крзно и виткан опаш. Не ја поднесува студената сезона, па во зима најдобро е да се прошетува неколку пати дневно, но кратко – од 10 до 15 минути.

Чивава

Поради малата градба и тенкото крзно, чивавата многу брзо се разладува. Одлично е приспособена на топлата клима во Мексико, но при пад на температурите брзо ја губи телесната топлина. Во студени денови препорачливо е шетањето да се сведе на минимум.

Француски булдог

Францускиот булдог има кратко и тенко крзно, а поради рамното лице чувствителен е и на топло и на студено време. Топол џемпер или јакна може да помогне, но потребно е да се избегнува долго изложување на екстремно ниски температури.

Кинеско голо куче

Оваа раса кучиња речиси и да нема природна заштита од студ. Нивното крзно се наоѓа само на главата, шепите и опашот. Ова чувствително и нежно куче мора да носи капут или топол џемпер при секое излегување, а понекогаш топла облека му е потребна и дома, доколку нема доволно греење.