Екипата на Еурофарм Пелистер преку социјалните мрежи го потврди продолжувањето на соработката со голманот Никола Митревски.

Искусниот голман така ќе го носи дресот на битолската гордост и во сезоната која следи со опција истиот да биде продолжен и за сезоната 2027/2028 кога би навлегол и во 43-тата година од својот живот.

По продолжувањето на соработката во Пелистер не го криеја задоволството.

„Некои вредности се поважни од секоја победа и секоја титула. Затоа нашата одлука е недвосмиолена – да ги задржиме тие вредности во клубот. Ни претставува задоволство што најдобриот македонски голман и во иднина ќе го носи дресот на Еурофарм Пелистер. Никола Митревски се обврза на нов договор за сезоната 2026/27 со својот матичен клуб, со опција за продолжување и за сезоната 2027/28. Митревски е роден победник, дете на клубот, човек кој се изгради и како личност и како професионален со преку две децении врвен ракомет. Освојуваше титули каде и да настапуваше, но задоволството е уште поголемо кога заеднички се радуваме на трофеи во Битола. Така ќе биде и во иднина“, порачаа од Пелистер.