Како што и се најавуваше и претходно, денеска доби потврда од римската „волчица“ која го промовираше своето прво летно засилување.

Педро (33) официјално потпиша договор на три години (30 јуни 2023) со екипата на Рома. Шпанецот е задоволен што ќе ги брани боите на римскиот клуб.

– Возбуден сум за овој предизвик и што ќе се натпреварувам со цел да ги оствариме нашите цели во наредните сезони. Благодарност до фановите кои ме пречекаа, се надевам дека ќе ги направам среќни – рече Педро.

Шпанскиот фудбалер играше за Барселона и Челси, со освоени 25 трофеи во кариерата, вклучувајќи титули во Лигата на шампионите, Лига Европа, Премиер лигата и Ла Лига.

Со националната репрезентација беше светски (2010 година) и европски шампион (2012). Севкупно запиша 65 натпревари за неговата селекција со 17 голови.

Рома се подготвува за новата сезона во италијанската Серија А чиј старт е планиран за 19 септември.