Неколку дена откако одекна веста дека починала легендарната актерка Дајан Китон, нејзиното семејство се огласи и ја откри причината за смртта, пренесува „Пипл“.

Актерката починала од пневмонија, открија членови на нејзиното семејство, а тие исто така изразија и благодарност до бројните обожаватели на нејзиниот лик и дело за, како што наведоа, нивната исклучителна поддршка и реакција на нејзината смрт минатата недела.

„Ги сакаше своите животни и беше непоколеблива во нејзината поддршка на заедницата на бездомници, така што какви било донации во нејзин спомен за локалната банка за храна или засолниште за животни би биле прекрасен и многу ценет придонес за неа“, додадоа тие.

Нагло влошување на здравјето

Портпаролот на семејството претходно потврди дека Китон починала во Калифорнија во саботата на 79-годишна возраст. Нејзин пријател откри за „Пипл“ дека здравјето на актерката „многу ненадејно“ и неочекувано се влошило во месеците пред нејзината смрт, нарекувајќи го тоа „скршено срце за сите што ја сакале“.

Иако Китон одлучи нејзината здравствена борба да ја задржи во приватност, во нејзиниот живот се случија големи промени кои укажуваа на проблеми. Во март, ненадејно ја огласи својата „куќа од соништата“ во Лос Анџелес за 29 милиони долари, иако претходно изјави дека таму планира да остане засекогаш. Друг извор додаде дека Китон, позната по секојдневните прошетки со своето куче низ квартот Брентвуд, во последните неколку месеци не била видена во јавноста.

Последната објава на Инстаграм на актерката, добитничка на Оскар, беше во април, а на неа изгледаше здраво и среќно додека се галеше со своето куче Реџи.

Приватен живот и страв од стареење

Китон никогаш не се омажи, но речиси две децении беше во врска со нејзиниот колега од филмот „Кум“, Ал Пачино, пред да раскинат во 1990 година. Беше во врска и со режисерот Вуди Ален и актерот Ворен Бити. Во своите 50-ти години посвои две деца, ќерката Декстер и синот Дјук.

Во интервју за „AARP“ во 2012 година, Китон искрено проговори за стравот дека нема да биде покрај своите деца како што старее.

„Многу сум свесна дека татко ми почина кога имаше 68 години, а мајка ми беше во раните 70-ти години кога нејзиниот мозок навистина почна да откажува. Кога размислувам за моите деца во нивните 20-ти и 30-ти години, и за себе во 70-тите и 80-тите години, дефинитивно се грижам за тоа“, рекла тогаш.

„Сакам да бидам тука за нив. „Сакам моето тело и ум да останат силни и да ги споделам сите овие животни лекции. Но, исто така знам дека им е потребна слобода и независност за да учат сами“, додала таа.

ВИДЕО | Непосредно пред смртта Дајан Китон го оствари својот животен сон: „Не можам да поверувам“