Основните училишта во Центар ќе спроведуваат онлајн настава
Обработки на лектири, тематски проекти, математички и логички задачи и проблеми, есеи ќе бидат дел од обврските на нашите ученици во овој период на домашен престој, велат од општината.
Договорен начинот и моделите на продолжување на наставниот процес преку електронски пат во Општина Центар. Градските власти и директорите на училиштата во оваа скопска општина договорија наставата да се спроведува на платформите Edmodo и Google classroom, како и веб-страниците на училиштата, мејлинг-листите и групите на Вибер и Фејсбук.
-Она што е многу важно е што учениците, покрај материјалите, ќе добиваат и задачи со точно утврдени рокови за изработка и доставување до наставникот по електронски пат. Обработки на лектири, тематски проекти, математички и логички задачи и проблеми, есеи се дел од обврските на нашите ученици во овој период на домашен престој. Целта е да не се изгуби континуитетот на наставата и учењето, а во исто време да се пополни слободното време на децата со активности соодветни на возраста, се вели во соопштението на Општина Центар.