Косовската претседателка Вјоса Османи ја обвини Србија дека отворено и континуирано се ангажира „да го спречи“ одржувањето на изборите на Косово.

Според Османи, ваквата заложба е спротивно на духот на Договорот за нормализација на односите, што страните го постигнаа во Брисел во февруари, но и на Анексот за имплементација на овој договор, кој беше постигнат во Охрид на крајот на март.

„Како таков, на овој пристап на Србија треба да му се спротивстави целиот демократски свет, бидејќи истовремено претставува чин на незаконско мешање од странство, акт што се казнува со низа меѓународни правни акти“, рече Османи.

Овие коментари Османи ги даде на средбата со првиот човек на Централната изборна комисија, Крешник Радониќи, еден ден по одржувањето на предвремените локални избори во четирите општини на северот на Косово, населени со мнозинство Срби.

Овие избори беа масовно бојкотирани од српското население, а излезноста, според ЦИК, беше само 3,47 отсто.

Според прелиминарните резултати, во трката за градоначалник во Северна Митровица и Лепосавиќ победија кандидатите на Движењето „Самоопределување“, додека во Звечан и Зубин Поток победија кандидатите на Демократската партија на Косово.

Од десет кандидати, само еден бил од српската заедница.

Српската Листа – главната партија на Србите во Косово – не учествуваше на изборите и повика на нивен бојкот.

Османи рече дека слабата излезност на изборите е поради тоа што жителите во тој крај биле подложени на „закани и уцени“ да ги бојкотираат изборите.