Првичната оценка за третиот пакетот мерки за ублажување на штетите од пандемијата предизвикана од вирусот Ковид – 19 на Организацијата на работодавачи на Македонија е дека тие позитивно ќе се одразат врз стопанството во земјава но крајниот став, како што велат, ќе го дадат откако мерките ќе бидат преточени во уредби со законска сила.

– Конечниот став ќе може да го кажеме откако најавените мерки ќе бидат преточени во Уредби со законска сила, затоа што во уредбите понекогаш се предвидуваат некои критериуми кои преставуваат пречка за користење на мерките, па така и добри идеи на Владата добиваат лоша реализација, велат од ОРМ.

Од таму побараа, пред нивно конечно донесување Владата да се консултира и со бизнис заедницата и истите да се разгледаат од страна на националниот економско-социјален совет.

Според ОРМ, мерките од третиот пакет кои директно се насочени кон стопанството би требало да придонесат што повеќе компании погодени од кризата да ја одржат својата економска активност и да го рестартираат бизнисот, со што би избегнале стечај, ликвидација и отпуштање на сите свои вработени.