Советот на Општина Карпош на денешната седница го усвои Буџетот за 2026 година, како и програмите за работа на општинските сектори и одделенија, со што официјално се трасираат приоритетите за развој на општината во наредната година.

На седницата, која беше шеста по ред, советниците разгледаа и гласаа по триесетина точки од дневниот ред, меѓу кои централно место имаше предлог-буџетот за 2026 година, кој доби мнозинска поддршка.

Според образложението, вкупниот консолидиран Буџет на Општина Карпош за 2026 година изнесува 2.159.676.279 денари (околу 35 милиони евра). Од овој износ, основниот буџет изнесува 1.332.434.279 денари (околу 21,6 милиони евра).

Министерството за финансии ја информирало општината дека максималниот износ на сопствени приходи за 2026 година ќе изнесува 608.436.000 денари, додека од ДДВ ќе се обезбедат 28.978.000 денари. Дополнително, Владата ќе обезбеди трансфери во износ од 615.020.279 денари, а во буџетот е вклучен и пренесен вишок од 80 милиони денари од претходната година.

Најголем дел од средствата, односно 69 проценти, ќе доаѓаат од трансфери и дотации, 26 проценти од даночни приходи, додека остатокот ќе се обезбеди од неданочни и капитални приходи.