Екипите на Јавното претпријатие на Општина Аеродром денеска ја расчистуваат локацијата на поранешниот ресторан „Мекдоналдс“, која се наоѓа на приватно земјиште, како што велат,  со запишан објект. Расчистувањето на крајот ќе си го плати сопственикот.

Иако сопствениците добија налог да ја исчистат оваа со години запуштена локација, тоа не беше направено. Поради тоа, на терен излегоа комуналните екипи на Општината. По уредувањето, Јавното претпријатие ќе достави фактура до сопствениците со износот за извршените работи, информираат од Аеродром.

Оттаму тврдат дека остануваат посветени општината да биде чиста и уредна и дека ќе продолжат да реагираат секаде каде што сопствениците не постапуваат согласно со законските обврски.