Иако крлежите се ситни животни, тие можат да пренесат многу сериозни болести. Нивниот број во Германија брзо расте во последните години, а со тоа и бројот на инфекции што ги пренесуваат. Експертите предупредуваат дека во 2025 година ќе има значително зголемување на случаите на Лајм-борелиоза и менингоенцефалитис на почетокот на летото (ФСМЕ) – две болести што се пренесуваат со каснување од крлеж.

Само во сојузната покраина Хесен, во текот на првата половина од 2025 година, дијагностицирани се повеќе од 13.000 случаи на Лајмска болест. Поточно, според податоците на Медицинското здружение на Хесен, регистрирани се 13.311 потврдени случаи. Покрај тоа, беа пријавени 22 случаи на ФСМЕ, што е повеќе од двојно во споредба со целата минатата година. Ова зголемување не е ограничено само на Хесен – сличен тренд е забележан и во други федерални покраини како што се Саксонија, Саксонија-Анхалт, Мекленбург-Западна Померанија и особено Баварија, која традиционално има голем број инфекции пренесени преку крлежи.

До почетокот на октомври 2025 година, во Баварија беа регистрирани околу 4.800 случаи на Лајмска болест, соопшти портпаролот на баварската покраинска канцеларија за здравје и безбедност на храната, објави Феникс магазин. За споредба, во истиот период во 2024 година беа регистрирани околу 3.500 случаи, а во 2023 година околу 2.900. Значи, ова е зголемување од дури 37 проценти за само една година. Крлежите претпочитаат влажни и засенчени места: шумски рабови, тревни патеки, грмушки и висока трева. Сепак, тие се сè почести и во парковите, градините и дворовите, дури и во урбаните средини.