Залихите од кондоми во олимпиското село на Зимските олимписки игри 2026 во Милано веќе се потрошени, само три дена по официјалното отворање на натпреварувањето, објавија организаторите.

За околу 2.900 спортисти на Зимските олимписки игри 2026 било обезбедено 10.000 кондоми, што е малку повеќе од три по личност, пренесе „БФМ“.

Ова е мошне помалку отколку на претходните Олимписки игри: во Рио 2016 биле поделени 450.000 кондоми – 42 по спортист, додека во Париз 2024 имало повеќе од 200.000, во Токио 2021  – 160.000, а во Пјонгчанг 2018 – 110.000.

Организаторите наведуваат дека недостигот не е „последица на зголемениот сексуален апетит кај спортистите, туку на малите почетни залихи“.

Обновувањето на залихите на кондоми е ветено, но без прецизен датум.

Традицијата на обезбедување бесплатни кондоми за спортистите постои уште од Олимписките игри во Сеул во 1988 година, со цел да се овозможи безбеден секс во текот на нивниот престој во олимпиското село.