Ојлески: Имавме добри и лоши моменти, треба да бидеме задоволни со бодот против Бидасоа
Еурофарм Пелистер освои важен бод против шпанската екипа на Бидасоа Ирун во салата „Боро Чурлевски“ – Битола и ги одржува шансите за пласман во нокаут фаза во Европската лига.
Тренерот на Еурофарм Пелистер, Ларс Валтер им се заблагодари на навивачите кои дојдоа во салата да ја бодрат екипата.
– Добро го започнавме натпреварот, одлично трчавме и без топка во првото полувреме. Но, потоа се почувствува тоа дека Хосни еден месец е без тренинг, дека Вилсон се враќа после повреда, Себастијан Хенеберг по болест и имавме пад во играта. Но, повторно се вративме и тоа не е за занемарување. Можеби во овој момент овој бод не изгледа како позитивен резултат, но по неколку дена сигурен сум дека ќе биде позитивен. Мислам дека екипата оди во позитивна насока на формата и овој бод може да биде многу значаен за пласманот во нокаут-фазата на Европската лига – рече Валтер на прес-конференцијата по мечот.
Гоце Ојлески, играчот на Еурофарм Пелистер кој двапати се запиша во листата на стрелците, имаше одличен цепелин во решавачките минути по асистенцијата на Ненад Костески.
– Честитки за гостинскиот тим. Мислам дека одигравме еден добар натпревар, иако во одредени период имавме добри и лоши моменти. Можеби се почувствува тој замор и затоа грешевме. Но, добро е тоа што на крајот се вративме, освоивме бод. Сакавме позитивно да ја завршиме оваа полусезона, мислам дека добро направивме, треба да бидеме задоволни од овој резултат – вели Ојлески.
