Без разлика каков ќе биде исходот од првиот финален натпревар во Унгарија, едно е сигурно, реваншот во Охрид ќе се игра во жешка атмосфера и пред преполни трибини во салата „Билјанини извори“.

Охрид соопшти дека билетите за реванш-финалето против Татабања биле распродадени за само 15 минути, што уште еднаш ја потврдува огромната еуфорија кај охридската публика пред историскиот меч во ЕХФ Европскиот куп.

Натпреварот ќе се игра на 31 мај, а се очекува салата крај Охридското Езеро да биде исполнета до последно место со околу 3.000 навивачи, колку што изнесува официјалниот капацитет.

За охридските ракометари сега останува задачата да обезбедат активен резултат на гостувањето во Унгарија, а потоа со поддршка од домашната публика да се обидат да испишат историја и да стигнат до првиот трофеј во клупската историја, воедно и прв меѓународен успех.