Баерн Минхен го потврди анагажманот на 24-годишниот десен бек кој утрово ги помина лекарските прегледи. Алваро Одриозола во Баерн Минхен ќе ги помине наредните шест месеци како позајмен фудбалер од Реал Мадрид за кого во првиот дел од сезоната одигра само четири натпревари.

– По разговорите со останатите членови од управата одлучивме да ги задоволиме потребите на тренерот Ханси Флик и да ја засилиме одбраната. Му благодариме на Реал Мадрид за соработката – рече првиот човек на баварците, Карл-Хајнц Румениге.

Тренерот Флик побара да му се ангажира десен бек бидејќи Џошуа Кимих го прекомандува во средниот ред, а Бенјамин Павар му ја додели штоперската позиција.

– Убедени сме дека Одриозола ќе му помогне на тимот со своите квалитети. Драго ми е што успеавме да најдеме десен бек со таков потенцијал – изјави Хасан Салихамиџиќ, спортскиот директор на Баерн.