Норвешкиот крал Харалд денеска е примен во болница на шпанските Канарски Острови, каде што престојува на зимски одмор, соопшти кралската палата, објави АП.

Харалд, кој во саботата наполни 89 години, вечерва е примен во болница на островот Тенерифе и се лекува од неименувана инфекција и дехидратација, се наведува во соопштението, при што се додава дека според извештаите кралот е во добра состојба.

Личниот лекар на кралот ќе отпатува на Тенерифе, а извештај за здравствената состојба на Харалд ќе биде објавен во среда, откако ќе ја процени ситуацијата, се додава во соопштението.

Како што е наведено, кралот Харалд и кралицата Соња се наоѓаат на Канарските Острови на зимски одмор. Харалд е крал на Норвешка од 1991 година.