Одбележан Светски ден на вранецот: Со автохтона сорта тргнавме да го освојуваме светот
Со повеќе манифестации и дегустации, Македонија го одбележува Светскиот ден на вранецот што годинава се одржува по четврти пат. Вранецот е наш најголем вински амбасадор, а негова дегустација имаше во регионот, а ќе се дегустира и во Швајцарија, Австрија, Обединетото Кралство, Холандија и во САД.
– Оваа година тргнавме со вранецот да го освоиме светот – рече извршната директорка на Здружението „Вина од Македонија“, Елена Младеновска Јеленковиќ.
Вранецот освен во Македонија го има и во Црна Гора, Босна и Херцеговина, Србија и во Косово.
– Ние од Балканот праќаме порака дека заедно чекориме на меѓународната сцена – рече Младеновска Јеленковиќ.
Таа потенцираше дека за да излеземе на меѓународната сцена, многу е важна Балканската винска мрежа, но за да се издвоиме од другите вина, треба да изградиме систем на географски индикатори.
– Прво тоа ќе се направи за Тиквешкиот вински регион, а потоа и за другите региони – рече Младеновска Јеленковиќ.
Претседателот на Управниот одбор на „Вина од Македонија“ и прв човек на најголемата винарница „Тиквеш“ Светозар Јаневски вели дека го промовираме вранецот за да го добие заслуженото место меѓу светски етаблираните вина.
– Во лозарството и во винарството мора да се вклучи науката. Ние мора да се бориме и за пазар. Сè уште на пазарите сме присутни со евтини вина. Исто така, не можеме во светот да бидеме препознаени како винска земја ако не ги запазуваме стандардите – рече Јаневски.
Тој смета дека треба да се издвојуваат пари за интернационален маркетинг, како и за самото лозарство, и да се работи на развивање премиум вина.
Јаневски потсети дека повеќе големи винарници се затворија. Сега има повеќе мали винарници и раситнети лозари.
– Има само 30-ина лозари на кои ова им е сериозен бизнис, другите се мали лозари и ако не се окрупнат, тие не можат да ги надминуваат тековните проблеми, а сега најголем проблем им е што нема кој да им го обере грозјето – рече Јаневски.
Винарството е втора извозна гранка по девизен прилив во земјоделството, по тутунот. За понатамошен развој на лозарството и винарството, министерот за земјоделство Љупчо Николовски најави нов начин на субвенционирање.