Од Уставниот суд го повторуваат апелот до Собранието што побрзо да се изберат нови уставни судии
Уставниот суд, од минатиот декември, функционира со шест судии што е само две третини од членовите потребни за неговиот целосен состав поради што оттаму повторно упатија апел до Собранието и до Судскиот совет што побрзо да се изберат уште три члена за, конечно тој да биде комплетен.
Поради пензионирањето и преместување на други функции, од судот во текот на минатата година заминаа тројца судии, а во меѓувреме, Собранието не ја отвори темата за нивна замена.
– Останува апелот до Собранието и до Судскиот совет, кој треба да предложи еден од судиите, тоа да го сторат што побрзо – изјави портпаролката на Уставниот суд Христина Беловска.
Уставниот суд, според законот, го сочинуваат девет судии. Претседателот го избира судот од редот на судиите за време од три години, без право на повторен избор. Судиите ги избира Собранието за време од девет години без право на повторен избор. Судиите на Уставниот суд се избираат од редот на истакнати правници.