РЦУК Куманово информира дека реката Пчиња се излеала од своето корито за околу 20 сантиметри на подрачјето кај селото Пелинце, во близина на Меморијалниот центар АСНОМ, како и на локацијата кај бања Стрновац. Противпожарната екипа интервенирала и од реката извлекла заглавен автомобил. Во моментов нема поплавени куќи или викендици.

Дополнително, кај Коински мост е забележано насобирање на поголема количина дрвја, што го отежнува протокот на реката Пчиња. За состојбата е навремено известено Водостопанство Куманово, кое ќе постапи согласно своите надлежности.

– На 19 ноември 2025 година во 07:35 часот, по повик од 112 за заглавени две лица кај бањата во село Стрновац, Општина Старо Нагоричане, ТППЕ Старо Нагоричане интервенираше со едно возило и двајца пожарникари – се вели во соопштението.

Од општината апелираат граѓаните да избегнуваат движење и активности покрај течението на реката Пчиња, а доколку се забележи лице во опасност, да се повикаат телефонските броеви: 031/495-666, 112 или 193.