Ако ѕирнете во утринските рутини на многу луѓе, ќе најдете едно заедничко нешто: топла шолја кафе. Овој популарен утрински пијалак помага да се започне денот со наплив на енергија, утеха и мотивација. Ако сте љубител на кафе, знаете дека тоа е секојдневен ритуал, и тоа не само во работните денови.

Но, каква хранлива вредност нуди кафето и што точно се случува во телото ако го пиете секој ден? Порталот „Рил симпл“ (Real Simple) разговарал со неколку регистрирани нутриционисти за да ги открие одговорите на овие и на други прашања.

Иако кафето може да изгледа како едноставно утринско поттикнување на енергијата, тоа нуди значајни нутритивни придобивки што го надминуваат самиот кофеин.

– Луѓето кои пијат две до три шолји кафе дневно забележуваат подобрувања во здравјето на срцето, помал ризик од мозочен удар и позитивно влијание врз шеќерот во крвта. Постои и широк спектар на докази кои покажуваат дека кафето е поврзано со здравјето на бубрезите. Исто така, знаеме дека полифенолите во кафето ги намалуваат воспаленијата и имаат позитивно влијание врз оние што живеат со автоимуни болести како што се мултиплекс склероза и Паркинсонова болест – вели диететичарката Кендра Хаире.

И спротивно на популарното верување, не постои поврзаност помеѓу консумирањето кафе и зголемените нивоа на крвен притисок – кога се консумира умерено (една до три шолји дневно).

– Кафето содржи голем број соединенија кои придонесуваат за неговите потенцијални здравствени придобивки – особено фенолните киселини, кои дејствуваат како антиоксиданти во телото и можат да го поддржат здравјето на крвните садови и да ја подобрат циркулацијата – вели Амна Хак, нутриционистка и експертка за женско здравје од Чикаго.

Освен овие биоактивни растителни соединенија, во кафето се наоѓаат и препознатливи хранливи материи.

– Кафето обезбедува есенцијални хранливи материи, вклучувајќи калиум, магнезиум и витамини од групата Б – вели нутриционистката Јулијана Вока.

Заедно со полифенолите од кафето, овие хранливи материи нудат импресивни здравствени придобивки, вклучувајќи подобрено здравје на мозокот, срцето, метаболизмот и на бубрезите. Одржувањето на телесната тежина и подобрените спортски перформанси се исто така поврзани со овој стимуланс.

– Кофеинот може да дејствува како супресор на апетитот, што помага во регулирањето на телесната тежина и малку го забрзува метаболизмот – додава Вока, нагласувајќи дека кофеинот ја обезбедува енергијата потребна за интензивни тренинзи.

– Умереноста е клучна. Се препорачува да се консумираат не повеќе од 400 милиграми (мг) кофеин дневно, а прекумерната консумација може да биде поврзана со зголемена анксиозност, нарушување на спиењето, проблеми со варењето, зависност и симптоми на одвикнување – вели Вока.

Со пиењето на последната шолја пред ручек или изборот на безкофеинско кафе по тој период, може да помогне да се избегнат какви било нарушувања на спиењето.