Руски беспилотни летала рано утринава погодија три индустриски магацини во западниот украински град Лавов, предизвикувајќи голем пожар и убивајќи најмалку едно лице, соопштија локалните власти.

Гувернерот на Лавовската област Максим Козицки изјави дека пожарникарите го гаснат пожарот. Службите за итни случаи соопштија дека пожарот се проширил на површина од 9.450 метри квадратни по нападот околу 5 часот наутро.

„Сакам да нагласам дека тоа се обични индустриски магацини. Таму не се складирало ништо воено“, рече Козицки на комуникациската платформа „Телеграм“. Тој додаде дека руските сили користеле 18 беспилотни летала во нападот, од кои 15 биле соборени, вклучително и седум директно над регионот Лавов.

Украинските воздухопловни сили соопштија дека Русија лансирала вкупно 30 дронови и една балистичка ракета Искандер во текот на ноќта и дека биле соборени 27 беспилотни летала. Русија постојано ја напаѓаше инфраструктурата клучна за одбрана на Украина, енергетскиот систем и земјоделството, но загинаа и многу цивили.