Новата стихозбирка на Ерол Туфан е со наслов „Жените и буквите“
Издавачката куќа „ПНВ Публикации“ на неодамна одржаниот Саем на книга ја промовираше новата стихозбирка „Жените и буквите“ од поетот, есеист и преведувач Ерол Туфан.
Покрај директната посвета во насловот на книгата, со поднасловот авторот го лоцира и сопственото битие како „еден талкач во туѓите соништа, кој понекогаш талка и во своите“. Предговорот за книгата го напиша професорката Искра Тасевска Хаџи-Бошкова.
– Жената во поезијата на Туфан зазема суштинско место и таа е издигната на нивото на поетски симбол. Во неа се слева сѐ, од умствените енергии на битието до пројавите на архетипот анима, чијшто изворен показател се недостижната убавина, душевното бранување и немирот кој таа го носи. Жената се актуализира низ телесноста, којашто суштински се поврзува со топлината и со мирисите на Медитеранот – меѓу другото, напиша Искра Тасевска Хаџи-Бошкова.
Книгата е илустрирана со слики од Стефан Хаџи Николов, кој е автор и на корицата. Поговор за книгата напиша поетесата Силвана Димитриевска.
– Структурално осмислена како едно „тајно писмо“, како повеќеслојна „азбука на жената“ во која буквата (знакот, симболот) се оплодува и се умножува со секое ново читање, „Жените и буквите“ се 31 буква за 31 интерпретација на сето она што значи женски принцип, дух, моќ, сила, вечна инспирација од почетокот на векот и човекот. По една буква за „недосегливата убавина на жената“, за секоја жена која го допрела поетовиот ум, его, емоции, му го обликувала светогледот, била негова водилка, учителка, љубовница, сакана… Од А до Ш, букви визуелно подредени во една логична, заокружена азбука, а всушност, лична онтологија за постоењето на жената како алфа и омега, без која не е воопшто можно да се зборува ниту за постоењето на светот – истакнува Силвана Димитриевска.
(Текстот е објавен во „Културен печат“ број 229, во печатеното издание на весникот „Слободен печат“ на 3-6.5.2024)