Ставот на Република Хрватска за поканата да ѝ се приклучи на Одборот за мир мора да биде усогласен меѓу претседателот на Републиката и Владата на Хрватска пред донесување каква било одлука, соопшти денеска Кабинетот на Зоран Милановиќ, со повик до премиерот Андреј Пленковиќ на консултации за да ги разгледаат сите релевантни информации, објави Танјуг.

Се наведува дека, имајќи ја предвид фактичката состојба дека Република Хрватска е поканета да пристапи кон Одборот за мир, кој е основан на предлог на претседателот на Соединетите Американски Држави, и дека станува збор за воспоставување нова меѓународна организација, а дека премиерот претходно соопшти дека Владата на Хрватска во моментов ги проценува правните и другите аспекти на предлогот, Владата на никаков начин не го консултирала претседателот на Републиката ниту го побарала неговиот став по ова прашање.

Цитирајќи член од Уставот на Република Хрватска, се наведува дека претседателот на Република Хрватска и Владата соработуваат во обликувањето и спроведувањето на надворешната политика.

Претседателот на Република Хрватска, Зоран Милановиќ, го повикува претседателот на Владата на Република Хрватска на консултации за да ги разгледаат сите релевантни информации и досегашните потези на Владата на Република Хрватска поврзани со поканата до Република Хрватска да пристапи кон Одборот за мир.

Милановиќ, се истакнува, очекува од претседателот на Владата на Република Хрватска сите информации за оваа стратешки важна надворешнополитичка тема.

„Ставот на Република Хрватска, согласно Уставот на Република Хрватска, мора да биде усогласен меѓу претседателот на Републиката и Владата на Република Хрватска пред донесување каква било одлука. Самостојното одлучување на Владата на Република Хрватска, во име на Република Хрватска, би било спротивно на Уставот на Република Хрватска“, предупреди Милановиќ.