Европската фудбалска Суперлига денеска доби нов удар со што донекаде се намали можноста за формирање посебно натпреварување во кое би учествувале само најголемите и најбогатите клубови во Европа.

Претставниците на Суперлигата поднесоа жалба до Европскиот суд на правдата, тврдејќи дека ФИФА и УЕФА имаат монополска позиција, дека ги нарушуваат правата на конкуренцијата и забрануваат учество во алтернативни натпреварувања, но денешниот одговор од судот покажа дека тоа е неточно, пренесува „Атлетик“.

– Правилата на ФИФА и УЕФА, според кои се играат сите натпреварувања, се во границите на законите на Европската унија за натпреварувања – изјави главниот адвокат на Европскиот суд на правдата, Атанасиос Рантос.

Случајот се однесува на минатогодишниот спор меѓу УЕФА и ФИФА од една страна и Европската Суперлига од друга, кој пропадна за помалку од 48 часа по негодувањето од навивачите, владите и играчите кои ги принудија Манчестер јунајтед, Ливерпул, Манчестер сити, Челси, Тотенхем, Арсенал, Милан, Интер и Атлетико Мадрид да се повлечат.

Недолго потоа УЕФА излезе со соопштение.

– УЕФА го поздравува недвосмисленото мислење на главниот адвокат Рантос, што е чекор напред кон зачувување на постоечката динамична и демократска структура на европската фудбалска пирамида. Таквото мислење ја зајакнува централната улога на федерациите во заштитата на спортот, претставувајќи ги основните принципи на спортски заслуги и отворен пристап за сите наши членови – се вели во соопштението на УЕФА.

Иако мислењето на Европскиот суд на правдата не е обврзувачко, се смета дека е доволно силно за да се стави крај на идејата за формирање на Суперлига, која не би била под покровителство на УЕФА и ФИФА.