Ураганот што го погоди источниот брег на САД предизвика прогласување на вонредна состојба во американската држава Њу Џерси, додека бројни летови беа одложени или откажани поради поплави и силни ветрови.

„Најголемото влијание на ураганот ќе биде можноста за поплави, особено во областите од североисточна Северна Каролина до поголемиот дел од брегот на Њу Џерси“, изјави метеорологот Боб Оравек од Националната метеоролошка служба, пренесува Еј-Би-Си Њуз.

Силни врнежи и бура се очекуваат и во југоисточна Нова Англија, областа на Њујорк и долж брегот на Јужна Каролина. Вонредната состојба во Њу Џерси е во сила од сабота вечер и ќе трае до понеделник, при што се очекуваат ветрови со брзина до 97 километри на час и врнежи до 13 сантиметри дожд.

Големи бранови веќе ги погодуваат крајбрежните делови на источниот брег, предизвикувајќи ерозија на плажите. Националната метеоролошка служба издаде предупредувања за поплави и силен ветер за градот Њујорк, кои ќе бидат на сила до понеделник попладне.

Доцнења и откажувања на летови се пријавени на аеродромите од Вашингтон до Бостон, додека властите ги повикуваат граѓаните да избегнуваат непотребни патувања и да се подготват за можни прекини на струја и поплави во наредните денови.